Donald Trump alirekodi hotuba mpya kwa njia ya video siku ya Jumapili, akiapa kulipiza kisasi kwa vifo vya Wamarekani watatu kufuatia mashambulizi ya pamoja ya Marekani na Israel dhidi ya Iran, na kuishutumu serikali ya Iran kwa “kuendesha vita dhidi ya ustaarabu wenyewe.”
Rais huyo wa Marekani alizungumzia vifo hivyo akisema, “Tunaomboleza kwa ajili ya wazalendo wa kweli wa Marekani ambao wametoa dhabihu ya mwisho kwa taifa letu, huku tukiendelea na dhamira ya haki waliyoitoa maisha yao kuitimiza,” na akaomba dua kwa ajili ya “kupona kikamilifu” kwa watu wengine watano waliojeruhiwa vibaya.
Hata hivyo, alionya: “Kwa masikitiko, huenda vifo zaidi vikatokea kabla ya hali hii kumalizika. Hivyo ndivyo ilivyo na kuna uwezekano wa kuendelea hivyo. Lakini tutafanya kila linalowezekana kuhakikisha hali hiyo haiji kuwa mbaya zaidi.”
United States Central Command (Centcom), ambayo inasimamia operesheni za kijeshi za Marekani katika Mashariki ya Kati kutoka makao yake makuu mjini Tampa, ilitangaza mapema Jumapili kuwa kufikia saa 9:30 asubuhi kwa saa za Mashariki mwa Marekani (ET), wanajeshi watatu wa Marekani walikuwa wameuawa na wengine watano kujeruhiwa vibaya katika operesheni ambayo Wizara ya Ulinzi ya Marekani imeipa jina la Operation Epic Fury.
Jeshi la Marekani halikubainisha ni lini na wapi vifo hivyo vilitokea, lakini vinatajwa kuwa hasara za kwanza kwa Marekani tangu Trump alipoamuru shambulizi dhidi ya Iran mapema Jumamosi.
Chanzo; Global Publishers
