Shirikisho la Mpira wa Miguu Afrika (CAF) limeanzisha masharti mapya ya makocha yanayohusu mashindano yote yanayodhibitiwa na shirikisho hilo, hatua itakayokuwa na athari moja kwa moja kwenye soka la ndani nchini Tanzania.
Sharti kuu ni kwamba kuanzia sasa, kocha msaidizi atakayekalia benchi katika mashindano ya Ligi ya Mabingwa Afrika, Kombe la Shirikisho, au mashindano ya timu za taifa za wakubwa wanaume anatakiwa kuwa na leseni Daraja A au Pro ya CAF, au leseni Daraja la Pro kutoka shirikisho lolote la bara jingine. Hadi sasa, kocha msaidizi alikuwa akiruhusiwa kukaa benchi akiwa na leseni Daraja B ya CAF au A ya shirikisho jingine, jambo linalobadilika kwa sheria mpya.
Kwa upande wa mashindano ya wanawake wakubwa na mashindano ya klabu za wanawake Afrika, masharti haya ni kama ya wanaume, ila kocha msaidizi anaweza kuwa na leseni Daraja B ya CAF. Hata hivyo, iwapo anatoka shirikisho jingine, lazima awe na leseni Daraja la Pro.
Timu za vijana za wanaume zinapaswa kufundishwa na kocha wenye leseni A ya CAF, huku msaidizi akiwa na Daraja B; iwapo mkocha msaidizi anatoka shirikisho jingine lazima awe na leseni Pro. Kwa timu za vijana za wanawake, kocha mkuu anatakiwa kuwa na leseni B ya CAF au A kutoka shirikisho jingine, na msaidizi lazima awe na leseni C ya CAF au angalau A kutoka shirikisho jingine.
Sharti jingine muhimu ni kwamba timu zinazoshiriki mashindano ya wanawake ya CAF lazima ziwe na angalau mmoja kati ya kocha mkuu au msaidizi kuwa mwanamke.
Hii ni tofauti na sheria za zamani zilizoruhusu wachezaji wote kuwa wanaume. Uamuzi huu unaonekana hauathiri klabu nne za Tanzania ambazo zilishiriki mashindano ya Klabu Afrika msimu huu, ikiwemo Young Africans (Yanga), Simba, Azam na Singida Black Stars, kwa sababu zote zina makocha wakuu na wasaidizi wanaokidhi vigezo vipya vya CAF.
Kaimu Katibu Mkuu wa Shirikisho la Mpira wa Miguu Tanzania (TFF), Oscar Mirambo, ameliambia Mwanaspoti kwamba masharti haya yatatekelezwa katika kanuni za mashindano ya hapa nchini siku za usoni.
Hata hivyo, kabla ya kufanikisha hilo, TFF italazimika kuandaa maandalizi maalum ya kiuwezeshaji kwa makocha ili kuhakikisha wanakidhi masharti mapya ya CAF.
Chanzo; Mwanaspoti
